நோயின்றி வாழ..!
அக்டோபர் 16 – உலக உணவு நாள்
காலை உணவைத் தவிர்க்காதே;
காபி தேநீர் அருந்தாதே!
பாலை மட்டும் அருந்தியபின்
பலகா ரத்தை உண்டிடுக!
மதிய உணவில் காய்கறிகள்
மற்றும் கீரை சேர்த்திடுவாய்;
அதிகப் புரதம் கொண்டிருக்கும்
இறைச்சி வகைகளைத் தவிர்க்காதே!
மாலை நேரம் விளையாடி
*மல்லாக் கொட்டை கடலையென
வேலை செய்யப் பலமளிக்கும்
விதைகள், பருப்பை உண்டிடுக!
எளிதில் செரிக்கும் உணவினையே
என்றும் இரவில் உண்டிடுக;
புளியை, உப்பை, காரத்தைப்
பொதுவாய்க் குறைத்தே உண்டிடுக!
மட்ட ‘துரித’ உணவினிலே
மயங்கா தென்றும் இருந்திடுக;
திட்ட மிட்டே உண்டிடுக;
தேக வலிமை போற்றிடுக!
வாயின் சுவைக்காய்க் கண்டதையும்
வாரி வாரி உண்ணாமல்
நோயில் நொடியில் வீழாமல்
நீண்ட காலம் வாழ்ந்திடுக!
– கே.பி.பத்மநாபன்,
சிங்காநல்லூர், கோவை
