‘உதிரி’ உடல்கள் மருத்துவ புரட்சியை ஏற்படுத்துமா
| இ |
றந்தபின் உடலை மருத்துவக் கல்லூரிக்குக் கொடையாகக் கொடுப்பவர்களைப் பற்றி அறிந்திருப்பீர்கள். அந்த உடல்கள் எதற்குப் பயன்படும்? நோய் போக்கும் மருத்துவ ஆராய்ச்சிக்குத்தான். இறப்பு ஏராளமாக இருந்தாலும், மனித உடல்கள் ஆய்வுக்குக் கிடைப்பது மிகவும் கொஞ்சமே!
மருத்துவத் துறையில் பல சவால்கள் இருப்பதற்கு முக்கிய காரணம், அறநெறிப்படி பெறப்பட்ட மனித உடல்களின் கடுமையான பற்றாக்குறை. மனித உடல்கள் என்றால், உடல் உறுப்புகள், திசுக்கள் மற்றும் மருத்துவ ஆய்வுகளுக்குப் பயன்படும் மனித மாதிரிகள் போன்றவற்றைச் சொல்லலாம். உயிர்த் தொழில்நுட்பத்தில் (biotechnology) ஏற்பட்டுள்ள அண்மைக் கால முன்னேற்றங்கள், சிந்திக்கவோ அல்லது வலியை உணரவோ முடியாத உயிரினங்களை உருவாக்க ஒரு வழியை வழங்குகின்றன. அதாவது, மூளை மற்றும் நரம்பு மண்டலம் இல்லாமல், வெறும் உடல் உறுப்புகளையும் திசுக்களையும் மட்டுமே உருவாக்க முடியும்.
இந்த யோசனை பலருக்கு அதிர்ச்சியாக இருக்கலாம். ஆனால், ஆராய்ச்சியாளர்களும் கொள்கை வகுப்பாளர்களும் இந்தத் தொழில்நுட்பங்களை ஒன்றிணைக்க முடிந்தால், மனித மற்றும் விலங்குகளின் ‘உதிரி’ உடல்களை நாம் உருவாக்க முடியும். ‘உதிரி’ உடல்கள் என்றால், தேவைப்படும்போது பயன்படுத்தக்கூடிய கூடுதல் உடல்கள் என்று பொருள்.
இந்த ‘உதிரி’ உடல்கள் (Ethically Spare Human) மருத்துவ ஆராய்ச்சியைப் புரட்சிகரமாக்கும். விலங்குகளின் மீது செய்யப்படும் சோதனைகளின் தேவையைக் குறைத்து, உறுப்பு மாற்று அறுவைச் சிகிச்சை செய்யக் காத்திருக்கும் பல உயிர்களைக் காப்பாற்றும். மேலும், மிகவும் பயனுள்ள மருந்துகள் மற்றும் சிகிச்சைகளை உருவாக்க உதவும். இது பெரும்பாலான மக்களின் அறநெறி எல்லைகளை மீறாமல், மருத்துவ முன்னேற்றங்களுக்கு வழிவகுக்கும்.
எடுத்துக்காட்டாக ஒருவருக்குச் சிறுநீரகம் செயலிழந்துவிட்டால், அவருக்கு உறுப்பு மாற்று அறுவைச் சிகிச்சை தேவைப்படும். தற்போது, உறுப்புக் கொடை வழங்குபவர்கள் குறைவாக இருப்பதால், பலர் நீண்ட காலம் காத்திருக்க வேண்டியுள்ளது. ஆனால், ‘உதிரி’ மனித உடல்பாகங்களை உருவாக்க முடிந்தால், தேவைப்படும் நபர்களுக்கு உடனடியாக உறுப்பு மாற்று அறுவை சிகிச்சை செய்ய முடியும்.
நரம்புகள் இல்லாத மனித உடல்களை உருவாக்குவதன் பின்னணியில் உள்ள அடிப்படைச் செயல்முறை மனித உடலை உருவாக்கத் தேவையான செல்களை ஆய்வகத்தில் வளர்ப்பது. இந்தச் செல்கள், மூளை மற்றும் நரம்பு மண்டலத்தை உருவாக்கத் தேவையான மரபணுக்களைக் (genes) கொண்டிருக்காது. இதனால், உருவாகும் உடல், உணர்வு மற்றும் வலி போன்றவற்றை உணர முடியாது.
இந்தச் செயல்முறையைச் சில முக்கிய நிலைகளாகப் பிரிக்கலாம்:
- ஸ்டெம் செல்கள் (Stem Cells) சேகரிப்பு:
முதலில், மனித ஸ்டெம் செல்கள் சேகரிக்கப்பட வேண்டும். ஸ்டெம் செல்கள் என்பவை எந்த விதமான செல் ஆகவும் மாறக்கூடிய சிறப்புச் செல்கள். இவை, எலும்பு மஜ்ஜை (bone marrow), இரத்த ஓட்டம் (blood stream) மற்றும் கரு (embryo) போன்ற பல்வேறு ஆதாரங்களில் இருந்து சேகரிக்கப்படலாம். கருவில் இருந்து ஸ்டெம் செல்களைச் சேகரிப்பது பல அறநெறிச் சிக்கல்களை எழுப்புகிறது. அதனால், எலும்பு மஜ்ஜை மற்றும் இரத்த ஓட்டத்தில் இருந்து ஸ்டெம் செல்களைச் சேகரிப்பது மிகவும் விரும்பத்தக்கது.
- மரபணு மாற்றம் (Genetic Modification):
சேகரிக்கப்பட்ட ஸ்டெம் செல்களிலிருந்து மூளை மற்றும் நரம்பு மண்டலத்தை உருவாக்கத் தேவையான மரபணுக்களை நீக்க மரபணு மாற்றம் செய்யப்பட வேண்டும். CRISPR-Cas9 போன்ற மரபணு எடிட்டிங் (gene editing) கருவிகள், இந்த மாற்றத்தைச் செய்யப் பயன்படும். இதன்மூலம், ஸ்டெம் செல்கள் நரம்பு மண்டலத்தை உருவாக்காமல், உடல் உறுப்புகளை மட்டும் உருவாக்கும்.
- திசு வளர்ப்பு (Tissue Culture):
மரபணு மாற்றப்பட்ட ஸ்டெம் செல்கள், ஆய்வகத்தில் திசு வளர்ப்பு முறையில் வளர்க்கப்பட வேண்டும். இந்த முறையில், ஸ்டெம் செல்களுக்குத் தேவையான ஊட்டச் சத்துக்கள் மற்றும் வளர்ச்சிக்குரிய காரணிகள் (growth factors) வழங்கப்பட்டு, அவை பல்வேறு வகையான திசுக்களாக மாற ஊக்குவிக்கப்படும்.
- உறுப்பு உருவாக்கம் (Organogenesis):
திசு வளர்ப்பு முறையில் உருவாக்கப்பட்ட திசுக்கள், 3D பயோபிரிண்டிங் (3D bioprinting) போன்ற தொழில்நுட்பங்களைப் பயன்படுத்தி உறுப்புகளாக உருவாக்கப்படலாம். 3D பயோபிரிண்டிங் முறையில், திசுக்கள் அடுக்குகளாக அச்சிடப்பட்டு, அவை ஒன்றிணைந்து உறுப்புகளாக உருவாகும்.
- உடல் உருவாக்கம் (Body Formation):
உருவாக்கப்பட்ட உறுப்புகள், செயற்கை எலும்புக்கூடு (artificial skeleton) அல்லது பயோரியாக்டர் (bioreactor) போன்ற ஒரு கட்டமைப்பில் ஒருங்கிணைக்கப்பட்டு, முழுமையான மனித உடல் உருவாக்கப்படும். இந்த உடல், தேவையான இரத்த ஓட்டம் மற்றும் ஊட்டச் சத்துக்களைப் பெற செயற்கை இரத்த நாளங்கள் (artificial blood vessels) மற்றும் பிற ஆதரவு அமைப்புகளைக் கொண்டிருக்கும்.
இந்தச் செயல்முறை பல தொழில்நுட்பம் சார்ந்த அறை கூவல்களைக் கொண்டுள்ளது. குறிப்பாக, சிக்கலான உறுப்புகளை உருவாக்குவது மற்றும் அவற்றை ஒரு முழுமையான உடலில் ஒருங்கிணைப்பது மிகவும் கடினமான பணியாகும். மேலும், இந்தச் செயல்முறையின் பாதுகாப்பு மற்றும் நம்பகத் தன்மையை உறுதி செய்வது மிகவும் முக்கியம்.
இவையெல்லாம் உருவாகத் தொடங்கிவிட்டால், தசை நார் முதல் சிறுநீரகம் வரை பல உறுப்புகளையும் எளிதில் மாற்றி, தேவையானவர்களுக்கு உரிய சிகிச்சையை
வழங்கலாம்.<