அரேஞ்ச் செய்க

வாடியே நின்றவர் கண்டு! – நீ

வாரிய ளிப்பதாம் தொண்டு!!

நாடியே பக்கம்நீ சென்று – சொல்லும்

நயவுரை தான்கற் கண்டு!!

(வாடியே)

ஏதிலார் ஏற்றிடும் ஏணி! – நல்

லின்பம் ஊறிடும் கேணி!!

ஓதிய நல்லறம் பேணி! – நீ

ஓட்டுவாய் வாழ்வெனும் தோணி!!

(வாடியே)

இல்லையென் றாருக்கே தஞ்சம்! – தந்தால்

இடர்தரத் துயர்வர அஞ்சும்!!

அள்ளிக்கொ டுப்பாயே கொஞ்சம்! – நீ

அணைக்க மகிழ்வாரே நெஞ்சும்!!

(வாடியே)

வாழைபனை போல உன்னைத் – தந்தே

வாழ்விப்பாய் நீயொரு அன்னை!

ஏழைக லங்கிடும் முன்னே – நீ

ஏந்தியே தாங்குவாய் கண்ணே!! <

(வாடியே)

– பாவலர் சுப.முருகானந்தம்