பிழைகள் 12 வகை மட்டுமே!(இதுதான் ஆங்கிலம்-3)
எம்.ஆர்.மனோகர்
நம் ஆங்கில மொழிப் பயன்பாட்டில் நூற்றுக்கணக்கான பிழைகள் ஏற்படலாம். ஆனால், மொத்தம் எத்தனை வகையான பிழைகள் உள்ளன? 12 மட்டுமே!
எல்லாப் பிழைகளையும் இந்த 12 வகைக்குள் அடக்கிவிடலாம், 13 ஆவது வகை என்று எதுவுமே கிடையாது. இந்த 12 வகைகளையும் புரிந்து கொண்டு அவற்றைத் தவிர்த்து விட்டால் நம் பேச்சிலும் எழுத்திலும் எந்தப் பிழையும் இருக்காது.
“ஹை ஜாலி!” என்று குதூகலிக்கிறீர்களா பெரியார் பிஞ்சுகளே? இனி அந்த 12 வகைகளையும் என்னவென்று பார்ப்போமா?
- தேவையில்லாமல் A, An, The போடுவது.
- தேவைப்படும் இடத்தில் போடாமலிருப்பது
- ஒன்றுக்குப் பதிலாக வேறொரு article போடுவது.
- தேவையில்லாமல் preposition போடுவது.
- தேவைப்படும் இடத்தில் போடாமலிருப்பது.
- ஒன்றுக்குப் பதிலாக வேறொரு preposition போடுவது.
- வார்த்தையின் தவறான வடிவத்தை உபயோகிப்பது. (Wrong form of words)
- முற்றிலும் தவறான வார்த்தையை உபயோகிப்பது. (Entirely Wrong words)
- வார்த்தைகள் இடம் மாறிவிடுவது (Wrong word – order)
- Punctuation mistakes (Comma, Full Stop Etc.,)
- Spelling mistakes (எழுத்துப் பிழைகள்)
- உச்சரிப்புப் பிழைகள் (Pronunciation mistakes)
இனி ஒவ்வொரு வகைக்கும் ஓர் எடுத்துக்காட்டு பார்க்கலாம். தருவதென்றால் நிறையவே தரலாம். இனிமேல் நீங்கள் முயன்று வகை வகையாகச் சேகரிக்க வேண்டும்.
12 வகைகளையும் பார்த்துக் கொண்டே எடுத்துக்காட்டுகளைக் கவனியுங்கள்
- ‘Thirukkural’ was written by The Thiruvalluvar.
இது தவறு. தனி நபர் பெயருக்கு முன்னால் ‘the’ வரக்கூடாது.
- My father is Engineer. தவறு. ‘E’ ஒரு vowel. எனவே, “an Engineer” தான் சரி.
- Thiru. M.K. Stalin is a Chief Minister தவறு. இருப்பது ஒரே முதலமைச்சர். எனவே, “the Chief Minister” தான் சரி.
- She married with Vijay. தவறு. with தேவையற்ற preposition.
She Married Vijay. சரி.
- What are you looking? தவறு.
தேவைப்படும் preposition – “at”
What are you looking at? என்பதே சரி.
- There was a fight between ten girls. தவறு.
இரண்டு பேர் இருந்தால் மட்டுமே between. எனவே, “among ten girls” என்பதே சரி.
- Did you broke the Chair? – தவறு.
நாற்காலியை உடைத்தது நீயா?
Did you break the chair? தான் சரி.
எனவே, இது break என்ற வார்த்தையின் தவறான வடிவம்.
(Wrong form of a word)
- I forgot my pen on the table. தவறு. வடிவமல்ல. முழு வார்த்தையே தவறு. நம்முடைய pen எதுவென்று எப்படி மறந்து போகும்? எனவே, Wrong word.
I left my pen on the table என்பதே சரி.
- வார்த்தைகளின் இட மாற்றம் Wrong word order.
Wanted a car for a doctor with Dunlop tyres. தவறு. ஏன்?
“டன்லப் டயர் பொருத்தப்பட்ட டாக்டருக்கு ஒரு கார் தேவை” என்றல்லவா ஆகிறது? டாக்டருக்கா டயர்? காருக்குத் தானே? இந்தப் பிழையை இரண்டு விதமாக நீக்கலாம்.
(i) Wanted for a doctor a car with Dunlop tyres. சரி.
(ii) Wanted a car with Dunlop tyres for a doctor. இதுவும் சரி.
- Punctuation mistakes.
ஒரு தூக்குத் தண்டனைக் கைதி நிரபராதி என்பது தெரிந்ததும்.
“Kill him not, leave him.” என்று ஒரு மன்னர் உத்தரவு அனுப்பினாராம்.
“Kill him, not leave him” என்று comma வை மாற்றிப் போட்டாதால் நிரபராதியைத் தண்டித்து விட்டார்களாம்.
- ‘Separate என்ற வார்த்தையை எழுதிக்காட்டு’ என்று சொல்லிப் பாருங்கள். பத்துக்கு ஒன்பது பேர் தவறாக எழுதுவார்கள். Saparate/ Seperate/ Saperate இப்படி நிறைய வந்து விழும். Separate என்று சரியாக எழுதியவர்களின் முதுகில் ஒரு தட்டு தட்டுங்கள் – வலிக்காதபடி!
- ஜூன் மாத இதழிலேயே பார்த்தோம். தவறான உச்சரிப்பு. வெங்காயம் – ஆனியன் அல்ல. (Onion) அன்யன். யாராவது சிரித்தால் சிரிக்கட்டுமே? நாம் சரியாக உச்சரிப்போம்
(Correct Pronunciation).
(அடுத்த இதழில் சந்திப்போமா?)
