கொம்பன் ஆந்தைகள் ஒரு தன்னனுபவம்(நூல் மதிப்புரை )
தென்றால் மணிமேகலை
புத்தகத்தின் பெயர்: கொம்பன் ஆந்தைகள் ஒரு தன்னனுபவம்
நூலாசிரியர்: த.முருகவேள்
பக்கங்கள்: 20
நன்கொடை: 100
வெளியீடு:
உயிர் பதிப்பகம்,
எண்: 4, 5வது தெரு, சக்தி கணபதி நகர்,
திருவொற்றியூர், சென்னை – 19
செல் : 9840364783
பகலில் கண் தெரியாது.
இரவில் கண் தெரியும் அது என்ன?
ஆம் ! ஆந்தை தான் சரியான விடை
மீன் ஆந்தை (fish owl), கோட்டான் (whimbrel) வன ஆந்தை என 200 வகை ஆந்தைகள் இருக்கின்றன. அவற்றில் ஒன்று கொம்பன் ஆந்தை பற்றி பார்க்கலாம்.
ஒவ்வொரு ஆந்தையும் அவற்றின் அளவு நிறம், வாழ்விடத்தைப் பொறுத்து வேறுபடும்.
பேராசிரியர் த.முருகவேல் அவர்கள் கொம்பன் ஆந்தைகள் பற்றிய தன்னுடைய அனுபவத்தை ஒரு புத்தகமாக எழுதி இருக்காங்க. அதுபற்றித்தான் நான் உங்களுக்கு சொல்லப் போறேன்.
நன்மங்கலம் காட்டுப்பகுதி அனைவரும் அறிந்ததே! இந்தக் காட்டுப்பகுதியில் 50 வகையான பறவைகள், சிற்றுயிர்கள். கொறி விலங்குகள் வாழ்கின்றன.
பலவகையான பறவை இனங்கள் இருந்தாலும் இரவாடியான கொம்பன் ஆந்தையே முதன்மையான பறவையாக அங்கு வாழ்கிறது.
வலுவான கால்கள், இரவிலும் ஊடுருவிப் பார்க்கும் திறன் கொண்ட கண்கள், இரையை வீழ்த்தும் திறன் பெற்ற, பலம் பொருந்திய அலகுகள் என வேட்டையாடி, இரையைப் பிடிக்கும் திறனைக் கொண்டிருப்பதால் வான்வெளியின் புலிகள் என்று கொம்பன் ஆந்தைகள் கருதப்படுகின்றன.
ஆந்தை இனங்களில் மிகப் பெரியதாக உள்ளவை கொம்பன் ஆந்தைகள். நல்ல பழுப்பு மஞ்சள் நிறத்தில் அடர் பழுப்பு மற்றும் கருப்பு நிற அடர்த்தியான வரிகள் இதன் உடலில் காணப்படுகின்றன. தலையின் மேல் கொம்புகள் போன்ற இறகுக் கற்றைகள் மேல் நோக்கி நீண்டிருப்பதால் தான், இந்த ஆந்தைக்கு “கொம்பன் ஆந்தை” என்று பெயர்.
கண்கள் உருண்டை வடிவத்தில் பெரிதாக மஞ்சள் நிறத்தில் காணப்படும்.
பச்சோந்தி எப்படி இடத்திற்கு ஏற்றாற்போல் நிறம் மாற்றிக் கொள்ளுமோ, அது போல ஆந்தைகள் வேட்டையாடும் நேரத்திற்கும், கண்கள் கருவிழி நிறத்திற்கும் தொடர்பு உள்ளதாக சிலர் கூறினாலும் ஆராய்ச்சியின் மூலமாக இதுவரை நிரூபிக்கப்படவில்லை.
ஆனால் இந்த வகை ஆந்தைகள் அந்திமாலையில் இரவில் அரிதாகப் பகலிலும் வேட்டையாடுகின்றன. பகல் பொழுதில் பாறையில் இடுக்குகளிலும் மாலையில் சூரிய ஒளியின் தாக்கம் குறையும் போதும் சுறுசுறுப்பாக வெளியில் வருவதை காணலாம். மேகமூட்டமான சமயங்களில் வழக்கமான நேரத்தை விட முன்பாகவே வெளியில் வந்து விடும். அது போன்ற நேரத்தில் ஆந்தைகள் எலிகளையே உண்டாலும் பாம்புகள், தவளைகள், வண்டுகள் போன்ற பூச்சிகளையும் உண்ணுகின்றன என்பதை அவை உண்டு செறித்துப் பின் உமிழ்ந்து இருக்கும் பெல்லெட்சை (pellets) எடுத்து உதிர்த்துப் பார்த்து ஆய்வின் மூலம் தெரிந்து கொள்ளலாம்.
கொம்பன் ஆந்தைகள் மழைக்காலம் முடியும் நேரத்தில் முட்டை இடும். அவை பெரிதாகக் கூண்டுகள் கட்டாமல் நிழலான பாறைகள் மேல் முட்டைகள் இடுகின்றன அல்லது பெரிய முட்புதர், மரத்தின் கீழ் கூட முட்டை இடும் என்று ஆய்வுகள் தெரிவிக்கின்றன; நான்கு முட்டைகள் அல்லது 2, 3 முட்டைகள் தான் இடும்.
கொம்பன் ஆந்தைகள் முட்டைகளை ஒரே நாளில் இடுவதில்லை. ஒரு நாள் விட்டு ஒரு நாள் இடும். எனவே குஞ்சுகள் பொறிப்பதும் தாமதமாகும்.
முட்டைகள் இடும்போது அந்த இடத்தை மூர்க்கமாகப் பாதுகாக்கும். ஒரு ஆந்தை அடைகாக்கும் போது பறவைகளோ மனிதர்களோ வேறு எந்த உயிரினமோ சென்றால் கடுமையாகத் தாக்கும் திறன் கொண்டது.
தாய் என்றாலே தன் குழந்தையை பாதுகாக்கும் ஆற்றல் உடையவள் இதில் தன் குழந்தைக்கு ஆபத்து என்றால் எந்த தாயாவது பார்த்துக் கொண்டிருப்பாரா? பறவைகளுக்கு மட்டும் என்ன விதிவிலக்கா?.
இது போன்று கொம்பன் ஆந்தைகளைப் பற்றி பல்வேறு தகவல்களைப் பேராசிரியர் தா.முருகவேல் எழுதியுள்ளார்.
அந்தப்புத்தகத்தை வாங்கி படித்து தெரிந்து கொள்ளவும்.<
