வெற்றிக்கு வழி!( சிறார் பாடல்)
மரத்தில் உள்ள பழங்கள் பறிக்க
மந்தி ரங்கள் வேண்டாவே!
வான மெங்கும் பறந்து திரிய
மாயப் போர்வை ஏனோசொல்!
மாளிகை ஒன்றை எழுப்பிக் கொள்ள
மாய மோதிரம் எதற்காக?
தேவைக் குரிய பொருளை எல்லாம்
தேவதை வந்தா தரவேண்டும்?
உண்மை யோடும் உறுதி யோடும்
ஊக்கத் தோடும் உழைத்தேநான்
வேண்டும் அனைத்தும் தேடிப் பெற்று
வெற்றி யோடு வாழ்ந்திடுவேன்!!<
– முனைவர் முரசு நெடுமாறன்
