ஞாலம் போற்றும்படி – நீ படி!
தேர்வு வருகிறதே – ஆண்டுத்
தேர்வு வருகிறதே!
ஓரிடம் அமர்ந்தபடி – முழுத்
தேர்வுக்குத் தினமும்படி!
தேர்ந்து படி – நீ
ஓர்ந்து படி!
காலை எழுந்து படி – அதி
காலை விழித்துப் படி!
அய்யம் அகலும்படி – பாடம்
அனைத்தும் நன்கு படி!
மாலையும் படி – இரவு
வேளையும் படி – பாட
நூலைப் படிப்பதே – உனது
வேலை எனப் படி!
காலம் எண்ணிப் படி – உனை
ஞாலம் புகழும்படி!
நூலை முழுதாய்ப் படி – கல்வி
நாளை ஏணிப்படி!
அட்டவணைப்படி – நீ
திட்டமிட்டுப் படி!
பட்டங்கள் பெறும்படி – தினம்
அட்டியின்றி ஆர்வமாய்ப் படி!
விரும்பிப் படி – தேர்வுக்கு
மறுபடி மறுபடி படி!
புரிந்து படி – நெஞ்சில்
பதியும்படி திரும்பப் படி
கருத்தாய்ப் படி!
வெற்றிப்படி ஏறும்படி – நீ
கற்றவை தெளிந்து படி!
தக்கபடி கற்பவை – மனதில்
தங்கும்படி படி படி!
குளறுபடி தவிர்த்தபடி – விடை
விளங்கும்படி எழுதப் படி!
மதிப்பு உயரும்படி – முதல்
மதிப்பெண் பெறப் படி!
மாநிலமே போற்றும்படி – முதல்
மாணவ மணியாய்த் திகழும்படி
மகிழ்ந்து படி சிறக்கும்படி!
உலகில் உய்யும்படி – ஆசான்
உரைத்தபடி நீ படி!
வெற்றிக்கனி உன்மடி – விழும்படி
விரைந்து படி!!
– ஆ.ச. மாரியப்பன்
புதுக்கோட்டை
