சிறுவர் பாடல்! – கணினி!
கணினி கற்றுப் பழகத்தான்
கைக்குள் அடங்கும் உலகம்தான்
முனியன் குப்பன் இவர்களுமே
முன்னே செல்வார் கணினியால்!
பனையள வுள்ள வேலைகளும்
பிரமிப் பூட்டும் ஆலைகளும்
தினையள வாய்தன் ஆளுமைக்குள்
திறம்படச் செய்யும் கணினிதான்!
கோடி மனித நினைவாற்றல்
கொடுக்கும் ஒற்றை கணினிதான்
தேடிச் சென்று கற்றிடவே
திரவிய மாகும் கணினிதான்!
கவனம் மட்டும் இருந்தாலே
கையில் தேர்ச்சி வந்திடுமே
புவனம் போற்றி உனைவாழ்த்தும்
புரிந்தால் வெற்றி உன்னிடம்தான்!
எந்த நாடு என்றாலும்
எளிதாய்ச் செய்தி கொடுத்திடலாம்
விந்தை மிகுந்த புதுமைதான்
வியக்க வைக்கும் அறிவியலே!
கணினிப் பயனோ இதுபோல
கணக்கில் அடங்கா தறிவாயா?
இனிநீ கணினி கல்லாமல்
இருந்தால் உலகில் பயனில்லை!
– அருப்புக்கோட்டை செல்வம்
