உணவைக் காப்போம்!

அக்டோபர்

தட்டில் வைத்த உணவினையே

தரையில் சிந்திக் களையாதே;

கொட்டிப் பரப்பி உண்ணாமல்

குறைவாய் உண்ணப் பழகிடுக:

கிட்டும் உணவை ஏழையர்க்குக்

கேட்கும் முன்னர் பகிர்ந்துண்க;

மட்டில் லாத மகிழ்வெல்லாம்

மனதில் பிறக்கும், நீஉணர்க!

உண்ணும் உணவின் பின்புலத்தில்

உழைத்தோர் பல்லோர் என்றறிக;

எண்ணி அவர்தம் உழைப்பினையே

என்றும் நீயும் மதித்திடுக;

உண்ண உணவே இல்லாமல்

உலகில் மாய்வோர் பலகோடி;

எண்ணி நீயும் உணர்த்திட்டே

எதையும் வீண்செய் யாதிடுக!

நெல்லின் மணிகள் ஒவ்வொன்றும்

நெடுநாள் உழைப்பின் பரிசாகும்;

கொல்லும் பசியால் வாடிடுவோர்

குறையைத் தீர்த்தல் அறமாகும்:

இல்லம் தோறும் எல்லோர்க்கும்

என்றும் வயிறு நிறைந்திடவே

நல்ல உணவைப் படைத்திடுவோம்;

நன்றாய்ப் பகிர்ந்து வாழ்ந்திடுவோம்!