பெரியாரின் பெருந்தன்மை
22 பெரியாரின் கதை
சுகுமாரன்
ஓவியம்: கி.சொ
விருதுநகரில் நடந்த கூட்டத்தில் பெரியார் பேசிக் கொண்டிருந்தார்.
யாரோ சில கயவர்களால் தூண்டப்பட்ட ஒருவன் திடீரென்று மேடையில் ஏறி, பெரியாரை கத்தியால் குத்த முயன்றான்.
குத்த வந்தவனின் கையைப் பெரியார் கெட்டியாகப் பிடித்துக் கொண்டார். அவனால் அசைய முடியவில்லை.
பெரியார் அவனை உற்றுப் பார்த்தார். அப்பாவி மனிதன், எய்தவன் இருக்க வெறும் அம்பாகப் பாய்ந்திருக்கும் இந்த மனிதனை ஏன் தண்டிக்க வேண்டும் என்று மனதிற்குள் எண்ணமிட்டார்.
அந்த மனிதன் பயத்தால் நடுங்கினான். அவனை அப்படியே மேடையிலிருந்த நாற்காலியில் உட்காரவைத்தார். அவன் பதட்டத்தை தணித்தார்.
அருகிலிருந்த தோழர்கள் அவனை போலீசில் ஒப்படைக்கலாம் என்று கூறினர். பெரியார் அதை ஏற்கவில்லை.
இதையெல்லாம் பார்த்துக் கொண்டிருந்த கூட்டத்தினருக்கு ஆத்திரம் பொங்கியது.
பெரியாரைக் குத்த வந்தவனை அடிக்கவும் உதைக்கவும் முன் வந்தனர்.
பெரியார் எல்லோரையும் அடக்கினார். கூட்டத்தினரின் ஆத்திரத்திலிருந்து காப்பாற்றி அவனைப் பத்திரமாக வீட்டுக்கு அனுப்பி வைத்தார்.
எதிரிக்கும் நன்மை செய்த பெரியாரின் பெருந்தன்மையை மக்கள் புகழ்ந்தனர்.
பெரியாரின் அன்புள்ளம்
தள்ளாத வயதில் உடல்நிலை இடங்கொடுக்காத நிலையிலும் பெரியாரின் சேவை தொடர்ந்தது. காரணம், பெரியாரின் அன்புள்ளம், மக்கள் மீது அவர் கொண்ட அன்பு அளவிடற்கரியது.
அதுபோல பெரியாரின் மீது தமிழ்மக்கள் கொண்ட அன்பு இமயமலையை விடப் பெரியது.
பெரியார் உயிருடன் இருந்த காலத்திலே தமிழ்நாட்டின் முக்கிய நகரங்களில் அவருக்கு சிலைகள் எழுப்பப்பட்டன.
தமிழ் மக்கள் தங்கள் அன்பை எடை போடுவதுபோல் பெரியாரின் எடைக்கு எடை வழங்கிய பொருள்களின் எண்ணிக்கை கணக்கிலடங்காது.
1964ஆம் ஆண்டு உணவு நெருக்கடிக் காலம், அரிசிக்குப் பஞ்சம் ஏற்பட்டது. காஞ்சிபுரத்தில் பெரியாரின் 86ஆவது பிறந்த நாள் விழா நடந்தது. பெரியாரின் எடைக்கு எடை அரிசி வழங்கப்பட்டது. ஆனால், பெரியார் அரிசியை மக்களுக்கு நியாய விலையில் கிடைக்க கூட்டுறவு சங்கத்திற்கே வழங்கிவிட்டார்.
திருவாரூரில் கொடுக்கப்பட்ட அரிசியை பிள்ளைகளின் மதிய உணவுக்குக் கொடுத்து-விட்டார்.
நீதிமன்றங்களில் பெரியாருக்கு விதிக்கப்பட்ட அபராதத் தொகையை மக்களே வசூல் செய்து கட்டினர்.
பெரியாருக்கு மூன்று முறை பிரச்சார வேன்கள் வழங்கப்பட்டன.
பெரியார் மக்களிடம் அன்பு வைத்தார். மக்கள் தங்கள் அன்பில் அவரை இன்னும் வேலை வாங்கினர்.
