சிறார் பொறுப்பு
புரட்சிக்கவிஞர் பாரதிதாசன் பிறந்தநாள் – ஏப்ரல் 29
– புரட்சிக்கவிஞர் பாரதிதாசன்
இன்று குழந்தைகள் நீங்கள் – எனினும்
இனிஇந்த நாட்டினை ஆளப் பிறந்தீர்!
– இன்று குழந்தைகள் நீங்கள்!
நன்றாய்ப் படியுங்கள்! நாட்டின் குழந்தைகாள்!
ஒன்றாய் இருங்கள் உயர்வினை எண்ணுங்கள்!
– இன்று குழந்தைகள் நீங்கள்!
குன்றி னைப்போல் உடல்வன்மை வேண்டும்!
கொடுமை தீர்க்கப்போ ராடுதல் வேண்டும்!
தின்றதையே தின்று தெவிட்டுதல் இல்லாமல்
அன்றன்று வாழ்விற் புதுமை காணவேண்டும்!
– இன்று குழந்தைகள் நீங்கள்!
பல்கலை ஆய்ந்து தொழில்பல கற்றும்
பாட்டிற் சுவைகாணும் திறமையும் உற்றும்
அல்லும் பகலும் இந்நாட்டுக் குழைப்பீர்கள்!
அறிவுடன் ஆண்மையைக் கூவி அழைப்பீர்கள்!
– இன்று குழந்தைகள் நீங்கள்!
(இசையமுது, முதற்பகுதி, ப.19, 1942)
