சிறுவர் பாடல் – புத்தகம்!
புத்தகமே அறிவுக்கு வித்து
புகழினையே பெற்றுத்தரும் சொத்து
வித்தகனாய் ஆக்குகின்ற பள்ளி
வீண்சோம்பல் போய்விடுமே தள்ளி!
அறியாமை இருளினையே ஓட்டும்
அணுகாதோர் வருந்திடவே வாட்டும்
சரியான பாதையினைக் காட்டும்
சத்துணவாய் மூளைக்கு ஊட்டும்.
எண்ணத்தில் உயர்வுநிலை நாட்டும்
இயலாமை என்பதையே ஓட்டும்!
நன்மையெலாம் அதனாலே பிறக்கும்
நம்நாடே கல்வியினால் சிறக்கும்!
படிக்கின்ற போதில்தான் நன்மை
பார்போற்றும் அதுதானே உண்மை!
வெடிக்கின்ற இலவமரப் பஞ்சும்
படிப்பவர்தம் தலையடியில் துஞ்சும்!
நூல்தானே ஒளிகாட்டும் விளக்கு
நுகராத பேர்களுக்கோ இழுக்கு!
நாள்தோறும் படித்தாலே இன்பம்
நழுவாமல் அவருடனே தங்கும்!
– அருப்புக் கோட்டை செல்வம்.
