பெருமை சேர்த்த பெரியார்
பெரியார் தாத்தா நினைவுநாள் – டிசம்பர் 24
தாழ்ந்து கிடந்த தமிழர் நெஞ்சைத்
தட்டி எழுப்பியவர் – அட
வீழ்ந்து கிடந்த மானம் தன்னை
மீட்டு நிமிர்த்தியவர்!
அறிவைத் துலக்க கல்வி கொடுக்கும்
ஆசான் ஆகியவர் – மனம்
மறந்து போன கொள்கைப் பிடிப்பை
மலர ஏவியவர்!
தேரான் நெஞ்சைத் தெளிய வைத்தே
திருப்பம் கூட்டியவர் – சமூகப்
போராட் டத்தின் புதிய மருத்துவம்
புலரக் காட்டியவர்!
மூடத் தனத்தில் தாவும் குரங்கு
மனத்தை உலுக்கியவர் – இங்கு
தேடக் கிடைக்கா மாந்தர் நேயத்
திருவை செதுக்கியவர்!
கண்ணிய மாகப் புவியில் வாழும்
கருத்தைத் தீட்டியவர் – நல்ல
பெண்ணிய வாழ்வு பெருமை கொண்டிட
பேதமை ஓட்டியவர்!
உதய ஞாயிறாய் ஒளியைத் தந்திட
உண்மை ஏந்தியவர் – மனம்
புதிய அறிவொளி பூக்க உலகிலே
பொதுமை ஊன்றியவர்!
– கல்லை மலரடியான்,
கல்லக்குறிச்சி.
