அறிவு இயக்கம் காட்டிடு
தேர்தல் இங்கே தேடி வந்தது
தேதி காட்டுது – அதில்
தேர்வு பெற்ற கட்சிக் காரர்
சேதி காட்டுது.
பாடு பட்டோர் பாடம் கற்றுப்
பார்த்துத் தேர்ந்தெடு – நமக்குப்
பயன்கள் செய்யும் வேட்பா ளரை
வார்த்துத் தேர்ந்தெடு.
மக்கள் ஆட்சி மலர்ந்து மணக்க
மாண்பு காத்திடு – நீயும்
மண்ணின் உரிமை காக்கும் கட்சி
மதித்துப் போற்றிடு.
அக்கம் பக்கம் பார்த்து நீயும்
ஆய்ந்து கண்டிடு – உன்றன்
அம்மா அப்பா வாக்கை வழங்க
அறிவைக் காட்டிடு.
தமிழர் வாழ்வைத் தாங்கி நிற்கும்
தங்கம் தேர்ந்தெடு – நமக்குத்
தமிழை, நாட்டைக் காத்துக் கொடுக்கும்
தமிழரைத் தேர்ந்தெடு.
பொய்யர் புரட்டர் புகுந்தி டாமல்
பூட்டுப் போட்டிடு – இங்கு
மெய்யர் வெற்றி பெற்று வந்திட
மெய்வழி காட்டிடு.
– தமிழாசிரியர் ஆ.நெடுஞ்சேரலாதன்,
தெற்குச் சோழபுரம்
