எண்ணும் எழுத்தும் கண்ணம்மா
ஒன்றும் ஒன்றும் இரண்டம்மா
உணர்வாய் தமிழே உயர்வம்மா
என்றும் இதுவே சிறப்பம்மா
எழுதி எழுதிப் பரப்பம்மா!
இரண்டும் ஒன்றும் மூன்றம்மா
இதயம் அன்பில் ஊன்றம்மா!
முரண்டு பிடிப்பது தீங்கம்மா
முத்தமிழில் பேர் வாங்கம்மா!
மூன்றும் ஒன்றும் நான்கம்மா
மூத்தோர் சொல்செவி வாங்கம்மா!
தோன்றும் நன்மை உனக்கம்மா
தூயோர் சொன்ன கணக்கம்மா!
நான்கும் ஒன்றும் அய்ந்தம்மா
நற்கலை பயிலத் துவங்கம்மா!
காண்போர் வாழ்த்து வருமம்மா
காலம் பெற்றுத் தருமம்மா!
அய்ந்தும் ஒன்றும் ஆறம்மா
அனுதினம் பள்ளி சேரம்மா!
முந்தும் திறமை பாரம்மா
முக்கியம் இதுவே கூறம்மா!
ஆறும் ஒன்றும் ஏழம்மா
அகிலம் புகழ்ந்திட வாழம்மா!
சேரும் செல்வம் உனக்கம்மா
செய்வாய் உதவி பிறர்க்கம்மா!
ஏழும் ஒன்றும் எட்டம்மா
இயலும் முன்னேற்றம் எட்டம்மா!
கூழும் குடித்துக் காட்டம்மா
கொள்கைப் பிடிப்பை நாட்டம்மா!
எட்டும் ஒன்றும் ஒன்பதம்மா
ஏற்ற உணவை உண்பதம்மா
கூட்டும் நலத்தை உண்மையம்மா!
கூடி வாழ்தல் நன்மையம்மா!
ஒன்பதும் ஒன்றும் பத்தம்மா
உயரிய ஒழுக்கம் வித்தம்மா!
மண்ணில் வாழ்வது சிறப்பம்மா
மகிழ்வு பெறுவது பொறுப்பம்மா!
எண்ணும் எழுத்தும் கண்ணம்மா
இதனை உணர்வாய் கண்ணம்மா!
மண்ணும் உன்னால் விண்ணம்மா
மாற்றிடும் நீ நல்ல பெண்ணம்மா!
– நீரை. அத்திப்பூ
