தேர்வு செய்யட்டும்; தடுக்காதீர்கள்
தேர்வு செய்யட்டும்; தடுக்காதீர்கள்
விளையாட்டுக்கு முக்கியத்துவம் தராமல், வகுப்பறைக்குள் பூட்டி, பொத்திப் பொத்தியே வைத்திருந்தால் உடலும் கெடும்; உள்ளமும் கெடும் என்பது தெரியும். நாடு எப்படி கெடும் என்பதை நான்காண்டுகளுக்கு ஒருமுறை இந்தியாவுக்கு எடுத்துக் காட்டிக் கொண்டிருக்கிறது ஒலிம்பிக்.
பெண் என்றாலே வீட்டைத் தாண்டிப் போகக் கூடாது. பெரியவளாக வளர்ந்ததும் விளையாடக் கூடாது என்றெல்லாம் அடக்கி வைக்கப்பட்ட நாட்டில் வெவ்வேறு போட்டிகளில் இரண்டு, மூன்று, நான்காம் இடங்களைப் பெற்று பெண்ணடிமை பேசுவோரின் முகத்தில் அறைந்திருக்கிறார்கள் சிந்து, சாக்சி, தீபா ஆகியோர். அவர்களுக்கு நம் வாழ்த்துகள்.
இப்போது திடீரென சிலர் விளையாட்டு பக்கம் தங்கள் பிள்ளைகளைத் தள்ளியிருக்கிறார்கள். அதிலும் இறகுப் பந்தாட்டத்தில் பி.வி.சிந்து வெள்ளிப் பதக்கம் பெற்றதும், மட்டையையும் இறகுப் பந்தையும் கையில் எடுத்துக் கொடுத்து பிள்ளைகளைக் கிளப்பியிருக்கிறார்களாம் சில பெற்றோர்.
எதையும் நீங்கள் எடுத்துக் கொடுக்காதீர்கள்; திணிக்-காதீர்கள். பிஞ்சுகள் தங்களுக்குத் தேவையானதை தாங்களே எடுத்துக் கொள்வார்கள். விளையாட்டோ, படிப்போ, ஆய்வோ, இசையோ, நடனமோ, சிலம்பமோ, நீச்சலோ அவர்களே முடிவு செய்யட்டும்.
தேர்வு செய்வதற்கான வாய்ப்பை வழங்குங்கள்; அவர்-களின் தேர்வைத் தடுக்காதீர்கள் என்பது தான் நமது வேண்டுகோள்.
