சிறுவர் பாடல்! – சோர்வு கூடாதே!
சோர்ந்து நீயும் இருந்துவிடாதே
சோம்பல்தான் வளரும் – உன்னைச்
சார்ந்து இருக்கும் நண்பருக்கென்றும்
சங்கடமே விளையும்.
மேகம் வானில் சோர்ந்து நின்றால்
மழைதான் பொழிந்திடுமா? – நல்ல
யோகம் வரட்டும் என்றே இருந்தால்
உயர்வு எட்டிடுமா?
முயற்சி செய்தால் வாழ்வில் எவரும்
முன்னே சென்றிடலாம் – மறுத்து
அயற்சி கொண்டால் புகழை இழப்பர்
அன்றே சொல்லிடலாம்.
பாயும் நீரின் சுறுசுறுப்பால் தான்
பயிர்கள் செழித்திருக்கு – இங்கு
நீயும் நானும் சுறுசுறுப்பானால்
நிச்சயம் ஜெயித்திடலாம்!
– அருப்புக்கோட்டை செல்வம்
