யாவும் ஆசான்!
செப்டம்பர் 5 – ஆசிரியர் தினம்
தாய்மை அன்பைக் கற்பிக்கும்
தாய்தான் நமக்கு முதலாசான்;
தூய்மை யான பாசத்தைக்
கற்பிப் பாரே தந்தையும்தான்;
எண்ணும் எழுத்தும் கற்பிப்பார்
என்றும் ஆசான் பள்ளியிலே;
மண்ணில் இயற்கைத் தோற்றமெல்லாம்
நமக்கே ஆசான், அறிவீரே!
கடமை தவறாச் செயல்புரிய
கற்பிப் பதுவோ கதிரவன்தான்;
திடநெஞ் சினையும் கொண்டிடவே
தெளிவாய்க் கூறும் பெருமலையே;
காலைச் சேவல் கூவலிலே
கற்போம் நேரம் தவறாமை;
வேலை செய்யும் சுறுசுறுப்பை
விளக்கிக் கூறும் தேனீக்கள்!
வருங்கா லத்தின் தேவைக்கு
வாழ்வில் இன்றே சேமிக்க
உருவில் சிறிய எறும்புகள்தாம்
உயர்ந்த பாடம் கற்பிக்கும்!
கவள உணவே ஆனாலும்
காகம் பகிர்வைக் கற்பிக்கும்;
எவரும் நன்றி கற்றிடலாம்
எளிய நாயின் செயலாலே!
பரிகற் பிக்கும் வேகத்தை;
பசுகற் பிக்கும் பாசத்தை;
அரிகற் பிக்கும் வீரத்தை;
அலைகற் பிக்கும் விடாமுயற்சி!
இயற்கை விளைவுகள் ஒவ்வொன்றும்
இங்கே நமக்கு ஆசான்கள்!
வியந்தும் உணர்ந்தும் தெளிந்திட்டால்
விளங்கும் வாழ்வின் அர்த்தங்கள்!
* பரி – குதிரை
* ‘அரி’ என்னும் பெயர்ச் சொல்லுக்கு பொருள்கள் பல உண்டு. இங்கு சிங்கம் என்னும் பொருளில் பயன்படுத்தப்பட்டுள்ளது.
கே.பி.பத்மநாபன்,
சிங்காநல்லூர்–கோவை
கே.பி.பத்மநாபன், சிங்காநல்லூர்–கோவை
பரி – குதிரை
அரி என்னும் பெயர்ச் சொல்லுக்கு பொருள்கள் பல உண்டு. இங்கு சிங்கம் என்னும் பொருளில் பயன்படுத்தப்பட்டுள்ளது.
Normal 0 false false false EN-US X-NONE X-NONE MicrosoftInternetExplorer4
