விலங்குகளைக் காப்போம்!
துள்ளித் திரியும் முயல்கூட்டம்;
தொட்டால் சுருளும் முள்பன்றி;*
புள்ளி மான்கள் பெருங்கூட்டம்;
புலியின் கோப உறுமல்கள்;
சீறும் சிறுத்தைப் பதுங்கல்கள்;
சிலிர்க்கும் சிங்கக் கர்ச்சனைகள்;
ஊறிக் கிடக்கும் நீர்யானை
உலவும் காண்டா மிருகம்தான்;
கூட்ட மாக யானைகள்
குரங்கின் கூட்டம் மரங்களிலே;
வேட்டை யாடும் வேங்கைகள்;
வீரம் நிறைந்த காட்டெருது;
ஒட்டகச் சிவிங்கி உயரம்காண்;
ஓநாய் நரிகள் கூட்டம்காண்
எட்ட நிற்கும் வரிக்குதிரை;
இடையே நகரும் மலைப்பாம்பு;
காட்டில் வாழும் விலங்குக்கு
கடின மான வாழ்க்கைதான்
வீட்டில் வளரும் நாய்பூனை
விருந்தைத் தினமும் சுவைத்திடுமே;
பட்டி தன்னில் ஆடுகள்தாம்;
பசுவும் கன்றும் தொழுவத்தில்;
முட்டித் தள்ளும் காளைக்கும்;
முழுதாய்க் காப்பு உழவனிடம்;
வண்டி இழுக்கும் குதிரைக்கும்
பொதியைச் சுமக்கும் கழுதைக்கும்
அண்டி வாழும் நிலைதனையே
ஆண்டாண் டுகளாய்த் தந்துவிட்டோம்
வனத்தை அழிக்கா திருந்திட்டால்
வாழும் காட்டில் விலங்குகள்தாம்;
மனமி ரங்கி விலங்குகளை
மனிதத் தோடு காத்திடுவோம்!
– கே.பி.பத்மநாபன்
கோவை
