விந்தையான தோழன்!
– முனைவர் முரசு நெடுமாறன்
கையில் உள்ள தடியே
கண்கள் ஆகும் எனக்கு!
பைய நடந்து செல்ல
பாதை காட்டும் தோழன்!
மேடு பள்ளம் காட்டும்!
மென்மை வன்மை உணர்த்தும்!
காடு மலைகள் என்றே
கருத்தில் அறியச் செய்யும்!
அண்ணன் தம்பி என்றும்
அன்பர் நண்பர் என்றும்
எண்ணில் லாத பேர்கள்
எனக்கும் உண்டே எனினும்,
இந்தத் தடியைப் போல
எந்த நாளும் உதவும்
விந்தை யான தோழன்
இந்த உலகில் உண்டோ?
