உலகச் சாதனை புரிந்த சிறுமி!
உலகப் பொதுமறையான திருக்குறள் ஒப்புவித்தல் போட்டி உலகெங்கும் பல்வேறு நாடுகளில், பல்வேறு அமைப்பினரால் நடத்தப்பட்டு வருகிறது. அந்த வகையில் விருதுநகர் மாவட்டம் வெம்பக்கோட்டை ஊராட்சி ஒன்றியம் க.மடத்துப்பட்டி ஊராட்சி ஒன்றிய தொடக்கப் பள்ளியில் இரண்டாம் வகுப்பு படிக்கும் மாணவி பி.கிருத்திகா ஹரிணி புதிய உலக சாதனையைப் படைத்துள்ளார். அவர் 200 குறட்பாக்களை 5 நிமிடம் 39 நொடிகளில் ஒப்புவித்து உலகச் சாதனை புரிந்தார். இந்தப் போட்டியை நடத்திய ட்ரைம்ப் உலக சாதனை (Triumph World Record) அமைப்பின் தென்மண்டல நடுவர் பி.எம்.சம்பத்குமார், இது ஒரு புதிய உலக சாதனை என அறிவித்தார். அதற்கான சான்றிதழையும் ஹரிணியிடம் வழங்கினார். இனி ஹரிணி 1330 குறட்பாக்களையும் ஒப்புவித்து உலக சாதனை செய்யப் பயிற்சி செய்து வருகிறார். அவருடைய முயற்சி வெற்றி பெற வாழ்த்துவோம், நாமும் அவரைப்போல் சாதனைகள் புரிவோம்.
