புயல்
வானை உரசிடும் வகையினில் உயர்ந்திடும்
வனத்துள பெருங்குடை மரங்கள் – புலி
ஆனை, கரடிகள் அரளவும் மிரளவும்
அசைத்திடும் பசுந்தழைச் சிரங்கள்!
தேனின் மலர்களைத் தெருமண் குடில்களைத்
திருகிடும் கடும்புயற் கரங்கள் – புவி
ஈனப் பதரென இழுத்துப் புடைத்திடும்
எழுந்ததன் கொடுங்கள முறங்கள்!
மானும், மயில்களும், மடவார் அனங்களும்
மருண்டிடும் இருண்டிடும் முகங்கள் – கதிர்,
கூனற் பிறையுடன் குளிர்விண் மணிகளைக்
குடைந்திடும் புயல்விரல் நகங்கள்!
கானை, மலைகளைக் கடலுடன் நதிகளைக்
கலக்கிடும் செயலதன் குணங்கள் – இரு
சேனை பொருதபின் சேர்ந்திடும் பிணமெனச்
சேர்ந்திடும் புயலிலும் பிணங்கள்!
பூணும் புயல்வெறிப் போரினில் பெருஞ்சதம்
புவியினில் அழிந்திடும் நலங்கள் – பினர்
காணும் சிறுசதம் களையிழந் தொருவிதக்
கவலையுள் அமிழ்ந்திடும் கலங்கள்!<
தளவை இளங்குமரன்
இலஞ்சி
