வெங்காயம்
தண்ணீர் பாய்ச்சிப் பதிப்பது – இது
தரையைக் கீறி முளைப்பது!
மண்மேல் தோகை விரிப்பது – தழை
மடலை வாளாய் வளைப்பது!
குண்டாய் உருண்டு பருப்பது – வந்து
குவிந்து கடையில் கிடப்பது!
கண்டோர் வாங்கக் கிடைப்பது – நன்கு
கறிக்கு வாசம் கொடுப்பது!
கொண்டா என்றே எடுப்பது – ஏழைக்
குடும்பம் கையில் பிடிப்பது!
ஒன்றோ ரெண்டோ கடிப்பது – கூழை
உறிஞ்சி நன்றாய்க் குடிப்பது!
தொண்டு செய்தே பழுத்தவர் – வெண்மைத்
தூய தாடி வளர்த்தவர்!
மண்டும் மடமை ஒழித்தவர் – பேச்சில்
மணமாய்க் கமழ்ந்து ஒலித்தது!
எண்ணி யாரும் உரித்திடும் – போது
எல்லாம் தோலாய் இருப்பது!
கண்ணில் நீரும் சுரப்பது – ‘வெங்
காயம்’ பேரால் சிறப்பது!
– தளவை இளங்குமரன்,
இலஞ்சி, தென்காசி
