சிறுவர் பாடல்
தென்னை மரம்
ஆற்றங் கரையின் மேட்டினிலே
அழகாய் நிற்கும் தென்னைமரம்
காற்றில் கீற்று சலசலத்தே
காதுக்கு இனிமை சேர்க்கும்மரம்
தென்னம் பாளை யும்மருந்து
தேங்காய் நமக்கு நல்விருந்து
இன்னும் இளநீர் தருவித்து
இதமாய்க் குளுமை சேர்க்கும்மரம்
தண்ணீர் ஊற்ற வளர்ந்திடுமே
தலையால் இளநீர் தந்திடுமே!
அன்னை தந்தை நட்டமரம்
அதன்பலன் நமக்குத் தந்தமரம்!
இன்றே நானும் தோட்டத்தில்
இரண்டு தென்னைகள் வைப்பேனே
என்றன் பின்னே வருவோரே
இதனின் பயனை அடைவீரே!
– அருப்புக்கோட்டை செல்வம்
